Nowe medije - kotrež wužiwamy jako towaršnosć hakle tři lětdźesatki - wolóža nam komunikaciju, su wuběrny grat informacije šěrić, dźělić, stworić, aktualizować.

Z tym zwjazane pak su tež brachi, z kotrymiž wuknjemy runje hišće prawje wobchadźeć. Jenička wopačna powěsć (Fakenews) zamóže dźensa wulku towaršnostnu škodu nadźěłać.

Pokazamy Wam móžne (wu)puće tutón naš nowy swět spomožnje wužić, strach před nowym a njeznatym zhubić ... teoretisce, praktisce, w skupinach abo w indiwidualnym trainingu ... wězo serbsce.

W blišim přichodźe maja tež w socialnych syćach nowe serbske kubłanske formaty nastać. Wuspytamy so tež na polu nowšich technologijow: 360° fota, VR wjedźenja, CNC technika, STT rěčne spóznawanje ...

Hač šulske kubłanje, dalekubłanja w powołanju abo za priwatne zajimy, něšto noweho nawuknyć so přeco wudani.

Team LUCIJA Was rady při tym přewodźa: wobkedźbuje, poradźuje, informuje, kubła, inspirěruje, nawjeduje, přewjedźe, wuhódnoći, změni, polěpši. Z wulkej wutrobu, wutrajnje a (nje)sćerpliwje wěnujemy so našemu naročnemu nadawkej: serbsku rěč a nowe medije na dobro serbskeho ludu, serbskich tradicijow a serbskeje kultury zasadźić, dalewuwić, zdźeržeć, znowa wunamakać, nałožować.

Zwjetša smy mobilnje po puću. Mamy pak  tež swójski studijo, seminarne rumnosće, modernu techniku. Při projektach a kubłanjach podpěraja nas młodźi, nazhonići referenća a cyły serbski dom.

Skićamy kóždy čas praktikum a prózdninske dźěło.

Tež serbšćina swětodaloki internet wobohaća. Stworimy sebi runje nowe rěčne a myslenske rumy. Jako runohódna rěč w digitalnym swěće wotbłyšćuje naše wšědne žiwjenje. Wšojedne hač ju miliony abo jenož dźesatka ludźi nałožuja.

Lětstotki nałožowana serbska rěč so tež  w modernym swěće dale wuwiwa. Trjebamy ju nuznje za wobstaće přichodnych globalnych  wužadanjow. Přetož: mono-lingualne towaršnosće su w swětowych stawiznach něhdy jónu zašli. Mono-kulturam faluje fleksibelnosć so spěšnje nowym wobstejnosćam přiměrić.

Tež Microsoft, Apple a google su to skónčnje zrozumili. Rěč je hłowny dźěl kultury. Kultura wobwliwuje naše myslenje. Jednotne mysle niča kreatiwitu, znjemóžnja dalewuwiće. Pomysliće raz kelko wšelakich komputerowych rěčow mjeztym mamy ?!?